विभाजित नेकपाद्वारा पार्टी कार्यालयहरूमा स्वामित्व दाबी गर्ने होडबाजी, आपसमै झडप
पार्टी गतिविधिलाई व्यवस्थित सञ्चालन गर्ने विगतको परिपाटी तोडियो
प्रतिनिधिसभा विघटनपछिनेकपाका दुई समूहबीच केन्द्रमा बहुमत देखाउने कसरत भइरहँदा प्रदेश, जिल्ला र स्थानीय तहमा पार्टी कार्यालय कब्जा र तालाबन्दी बढेको छ । प्रधानमन्त्री केपी ओली तथा अध्यक्ष पुष्पकमल दाहाल प्रचण्ड र माधवकुमार नेपाल पक्षबीच कार्यालयहरूमा स्वामित्व दाबी गर्ने होडबाजी नै चलेको छ ।
खासगरी, ६ पुसपछि पार्टी कार्यालय कब्जाको लहर चलेको हो । पार्टी कार्यालय कब्जा र तालाबन्दीका क्रममा कञ्चनपुरमा ओली समूहले लगाएको ताला प्रचण्ड-नेपाल समूहले तोडेको छ । त्यस्तै कैलालीस्थित नेकपा प्रदेश, जिल्ला र नगर कमिटीहरूका कार्यालयमा दुवै पक्षले ताला लगाएका छन् । अत्तरियास्थित गोदावरी नगर कमिटी कार्यालयमा प्रचण्ड–नेपाल समूहले दुई दिनअघि ताला लगाएको थियो । केहीबेरमै ओली पक्षले तोडेर छुट्टै ताला लगाएको छ । यसैगरी धनगढीस्थित नेकपा जिल्ला कार्यालयमा प्रचण्ड–नेपाल समूहले सधैँ लगाउने तालामाथि अर्को ताला पनि झुन्ड्याएको छ । धनगढीमै रहेको नेकपा प्रदेश कार्यालयमा पनि प्रचण्ड–नेपाल समूहले ताला लगाएको छ ।
यसैगरी हेटौँडामा पार्टी कार्यालयमा भेला आयोजना गर्दा ओली समूहले बिथोल्ने देखिएपछि प्रचण्ड–नेपाल समूहले आइतबार पार्टी प्यालेसमा जिल्ला भेला गरेको छ । यसैगरी नेकपा सिराहा जिल्ला कार्यालय प्रचण्ड-नेपाल समूहका कार्यकर्ताको नियन्त्रणमा छ । सदरमुकाम सिराहास्थित कार्यालय आफूहरूको नियन्त्रणमा रहेको प्रदेश- २ का सांसद तथा नेकपा जिल्ला सचिव प्रमोदकुमार यादवले बताए । अहिले पार्टी कार्यालय बन्द छ । अर्को पक्षले दाबी गर्न नसक्ने उनको भनाइ छ ।
त्यस्तै गत बिहीबार बिहान ओली र प्रचण्ड–नेपाल पक्षबीच नुवाकोट सदरमुकाम विदुरस्थित पार्टी कार्यालयमा ताला फोडाफोड भयो । ओली पक्षले कार्यालयमा चियापान कार्यक्रम आयोजना गरेको थियो । तर, प्रचण्ड-नेपाल समूहले चाबी दिएन । त्यसपछि ओली समूह ताला फोडेर कार्यालयमा प्रवेश गरेको थियो ।
यता ओखलढुंगामा पनि नेकपा पार्टी कार्यालयमा दुईवटा ताला लागेका छन् । शनिबार प्रचण्ड–नेपाल समूहले पार्टी कार्यालय कब्जा गर्ने उद्देश्यले नियमित लगाउनेभन्दा फरक ताला झुन्ड्याएपछि आइतबार बिहान ओली समूहले त्यसमाथि अर्को ताला लगाएको छ ।