मुख्य समाचारसमाज

चीनतर्फको उत्तरी नाका रसुवागढी र तातोपानी नाकाबाट रोकिएका सामग्री भित्रिन थाले

भदौ ३१, काठमाण्डौ – कोरोनाका कारण तिब्बतमा गरिएको लकडाउनपछि बन्द रसुवागढी र तातोपानी नाकाबाट सामग्रीको आयात सुरु भएको छ ।

चीनतर्फ रोकिएका व्यापारिक सामग्रीमध्ये पहिलो चरणमा हिजो सात चिनियाँ कन्टेनर रसुवागढीमा आइपुगेको छ । साउनको तेस्रो हप्तायता बन्द रसुवागढी नाकाबाट हिजोदेखि व्यापारिक सामग्री आयात सुरु भएको हो । कोभिड–१९ नियन्त्रणका लागि भन्दै यो नाका चिनियाँ पक्षले बन्द गरेको थियो ।

चिनियाँ जनकङ्ग्रेस स्थायी समितिका अध्यक्ष ली चान्सुको नेपाल भ्रमणका बेला भएको छलफलपछि रसुवागढी नाकाबाट सामग्री आयात हुन थालेको हो । हिजो ७ वटा कन्टेनर नेपाल भित्रिएको रसुवा भन्सार कार्यालयका प्रमुख रामप्रसाद मैनालीले जानकारी दिनुभयो । उहाँका अनुसार केरुङमा रोकिएका कन्टेनर चिनियाँ पक्षले आउँदो असोज ११ गतेसम्म पठाइसक्ने जानकारी दिएको छ ।

दशैँका लागि नेपाली व्यवसायीले चीनबाट झिकाएको झण्डै दुई अर्ब ५० करोड बराबरको मालसामान केरूङ क्षेत्रमै रोकिएको थियो । तर ढिलै भए पनि आयात हुँदा ठूलो सहयोग मिलेको नेपाल हिमालय सीमापार वाणिज्य सङ्घका अध्यक्ष अशोककुमार श्रेष्ठले बताउनुभयो । त्यस्तै तातोपानीमा रोकिएका कन्टेनर पनि नेपाल भित्रिरहेका छन् ।

Related Articles

Leave a Reply

Your email address will not be published. Required fields are marked *

Back to top button